آذربایجاندا قوربان بایرامی

آذربایجاندا قوربان بایرامی
محمد شکری

قوربان بایرامی آذربایجان مدنیتینده یالنیز دینی بیر مراسیم دئییل، عئینی زاماندا اینسانلاری بیر-بیرینه باغلایان، خئییر-شری پایلاشان کؤکلو بیر «ائل بایرامی»دیر. حاجی‌لار و مذهبی اینانجلار بو بایرامین اساسینی تشکیل ائتسه ده، زامانلا ائل ایچینده اؤزل سوسیال و مدنی عنعنه‌لرله قایناییب-قاریشمیش و میلّی روح قازانمیشدیر.

بو بایرامین ان گؤزل و اؤنملی خوصوصیتلریندن بیری توپلومسال دایانیشمادیر. اینسانلار اورتاق قوربانلیق آلیر، قوهوم-قونشو ایله بیرلشیب قوربان کسیر و اونون اتینی هئچ بیر فرق قویمادان یوخسوللار و احتیاجی اولانلار آراسیندا پایلاییرلار. بو، جمعیتده برابرلیگی و حلال-حارام دویغوسونو گوجلندیرن ان عالی دَیرلردن بیریدیر.

آذربایجاندا قوربان بایرامی‌نین ان رنگارنگ و اؤزل عنعنه‌لریندن بیری ده آداخلی (نیشانلی) بَی-گلین‌لرله باغلیدیر. بو بایرام، بَی عائیله‌سی‌نین گلین ائوینه گئتمه‌سی و هدیه‌لر آپارماسی اوچون واجیب ساییلان گونلردن بیریدیر. قوربان بایرامیندا بَی ائوی ان یاخشی قوربانلیق قوچو سئچر، اونون یونو خنالانار، بوینوزلارینا قیرمیزی لئنت باغلایار و بوینونا زنگ آساراق اونو گؤزلجه بزه‌یه‌ر.

بو قوربانلیق حئیوان تک آپاریلماز؛ اونونلا یاناشی گلین اوچون یئنی پالتارلار، قیزیل-زینت اشیالاری، چئشیدلی شیرینیاتلار، مئیوه‌لر و پارچالارلا دولو گؤزقاماشدیریجی «قوربان بایرامی خونچالاری» حاضیرلانار. گلین ائوینده بو خونچالار سئوینجله قارشیلانار، قوناقلیق وئریلر و ایکی عائیله آراسینداکی حؤرمت و سئوگی بیر داها مؤحکملنَر.

خولاصه، آذربایجاندا قوربان بایرامی تکجه بیر عیبادت دئییل؛ سِئوگی‌نین، پایلاشمانین، یاردیملاشمادین و یئنی قورولاجاق عائیله‌لره وئریلن دَیَرین ان گؤزل تظاهورودور. بو بایرام، خالقین هم اینانجینی، هم ده مین ایللیک مدنی کؤکلرینی اؤزونده یاشادان بیر شنلیکدیر.
ــــــــــــــــــــــــــــــــــــ
📌 قاراچوخا؛ کیملیک و خبر آیناسی
عضو اولماغی اونوتمایین 👇
🆔 @qarachukha
اینستاگرام: @qar.achukha