کؤرفز اؤلکه‌لریندن ایرانا قارشی اورتاق تپکی: کویت و بحرینه هوجوملار محکوم ائدیلدی

قاراچوخانین ایچ و دیش مئدیالاردان آلدیغی خبره گؤره، خلیج اؤلکه‌لری بیرلشه‌رک ایرانین کویت و بحرینه ائتدیگی ادعا ائدیلن موشک و درون هوجوملارینی سرت شکیلده محکوم ائدیبلر.

اماراتین خاریجی ایشلر وزارتی بو هوجوملاری محکوم ائده‌رک، بونون بؤلگه تهلوکه‌سیزلیگینه ضرر ووردوغونو وورغولاییب. خلیج فارس امکداشلیق شوراسینین باش کاتیبی ده بو هوجوملارین داوام ائتمه‌سینی قیناییب.

کویتین خاریجی ایشلر وزارتی بو آددیمین میلتلرآراسی حوقوقون، اؤلکه‌نین حاکیمیتینین و توپراق بوتؤولویونون آچیق شکیلده پوزولماسی اولدوغونو بیلدیریب. کویت آیریجا، اؤز توپراقلارینی مودافیعه ائتمک اوچون لازیمی آددیملار آتما حاقینی قورودوغونو وورغولاییب.

عربستان و قطرین خاریجی ایشلر وزارت‌لری ده بو حادثه‌لری بؤلگه‌سل تهلوکه‌سیزلیگه تهدید آدلاندیراراق، کویت و بحرینله تام هم‌رأی اولدوقلارینی اعلان ائدیبلر. قطر آیریجا، بؤلگه‌ده‌کی تنشلرین آزالدیلماسی ضرورتینی وورغولایاراق، ایسرائیلین لوبنان اوردوسونا ائتدیگی تجاوزو دا محکوم ائدیب.

#ایران #کویت #بحرین #عربستان #قطر #سیاست #اقتصاد #اورتا_دوغو #گرگینلیک #قاراچوخا_نیوز